[img][[/img]

快艇24歲「入樽王」比歷克格芬、隊友基斯保羅同紐約人小前鋒安東尼，噚日旋風式訪問香港一日，3位球星喺理工大學向15名本地青少年指導球技，有學員問身高2米08嘅格芬有乜方法增高，佢認真答叫港人飲多啲牛奶。近日傳出湖人下季結束後，力邀安東尼過檔，當事人喺大會護航下避答。
3人風塵僕僕，上星期六晚喺台北信義區示範完入樽後就趕去機場，噚日凌晨12點幾抵港，朝早10點踏入理大室內籃球場教波。雖然瞓得少，但佢哋都冇乜倦意，好落力教波，可惜時間太早，又撞正公眾假期，除咗歌手張繼聰同永倫嘅香振強到場力撐外，就冇乜粉絲啦！


■安東尼（白衫左起）、比歷克格芬和基斯保羅雖然短暫訪港，心情依然high爆。



■格芬（左）精力充沛，落力指導本地球員。

格芬飲奶先咁高
2011年當選「新人王」兼「入樽王」嘅格芬好識搞氣氛，將個籃球當足球剔咗幾下已經贏得唔少掌聲，佢哋向本地青少年教咗走籃、投射等基本動作，教足45分鐘，格芬仲即興入咗1次樽，之後有位身高約1米75嘅學員膽粗粗問佢哋點解會生得咁高，格芬就妙答：「我細個成日飲牛奶囉！」身高亦有2米03嘅安東尼，就答細個嗰陣已成日跳嚟跳去，只得1米83嘅基斯保羅好無奈咁講：「我生得太矮，答唔到你。」


■張繼聰（右）和香振強（左）一齊入場睇球星。黃永俊攝

跟住嘅記者會環節，竟然唔設記者提問，大會只預設約6、7條問題由司儀提問，美國《ESPN》近日報道湖人出動銀彈攻勢，下季結束後力邀安東尼同勒邦占士加盟，不過呢條問題都「被過濾」，唔通真係咁敏感？從未贏過總冠軍嘅安東尼只答：「好多人都覺得紐約人會贏到總冠軍，但次次我哋都唔得，希望下季會贏到啦！」
佢哋之後再去灣仔贊助商專門店參觀後，晏晝4點就上私人飛機返美國，結束唔夠20個鐘頭嘅短暫香港之旅。


來源:蘋果日報網站