NBA周二公佈新一季賽程，10月29日嘅揭幕戰可以話係大戰連場，先有力爭3連霸嘅熱火主場鬥公牛，仲有「Battle LA」，湖人主場硬撼快艇，戲碼真係好勁，球迷仲有機會可以見到，養傷已久嘅公牛控衞戴歷路斯同湖人巨星拜恩復出；咁多好波睇，你ready未？
熱火新球季首日主場面對公牛，係咪覺得有啲唔夠喉？唔緊要，因為仲有湖人對快艇。去季尾因傷收「咧」嘅Kobe，早前喺香港已經講過話傷勢神速復原，唔排除可以喺首戰上陣，令到紫金軍團球迷極之期待。至於，話明會出戰季前賽嘅戴歷路斯，好有可能喺揭幕戰亮相。


■新一季ＮＢＡ揭幕，重頭戲湖人主場撼快艇，球迷又可一睹快艇控衞基斯保羅風采。資料圖片

聖誕檔期好戲連場
聖誕大戰戲碼都好勁，除咗已知嘅湖人對熱火、勇士對快艇之外，仲有德州大戰，馬刺將會大鬥有懷特侯活加盟嘅火箭。球迷見到大戰連場梗係開心啦，不過熱火老將柏迪亞就唔多認同，因為熱火聖誕節作客湖人之外，感恩節個周末都係作客，大時大節先嚟冇得同家人度過，畀着你都火滾啦。常規賽將會喺4月16日煞科，明星賽於2月16日響新奧爾良舉行。




來源:蘋果日報網站